2号朝早谂住9点半出发去茶山食鸡，可惜去到饲料厂嗰度已经俾交警封路，话山上面已经塞死，咁冇偈嘞，我就即刻打电话俾朋友问附近有咩特色嘢食，朋友话翻出去大雁山行滨江大道往江门方向行一阵就见到一间农庄嘅广告牌，喺嗰条路仔度转入去就揾到嗰间农庄，几多特色嘢食，咁我哋就出发去嘞~确实沿住滨江大道行可能唔够两公里就见到农庄牌嘞，啱喺滨江大道收费站前面转右嘅，条路仔仲係砂石路，路仔边不断有指引牌嘅，跟住行就得嘞，好快就到~哩间农庄环境真係好嘞，除咗路对面有啲村仔之外，旁边全部都係田同植物，再隔篱就係山，农庄前面係一个大鱼塘，再前啲就係停车场，不过唔大~农庄係经过鱼塘边嘅走廊入去，然后就係1个厅，穿过之后前边就分成两条廊，右边又係1个厅~1条廊係通往几间房嘅，房嘅另一边就係鱼塘，另1条廊就宽啲，因为有位食饭，哩条廊嘅另一边係一个好大嘅荷塘(我哋就决定坐喺哩条廊度)，两条廊嘅尽头又係1个厅，而走廊边嘅两个厅都俾荷塘包围住，景观几好~坐低之后我哋就点菜，我哋点咗禾秆蒸猪肉、蒸猪肉丸、蒸黄骨鱼、招牌农庄豆腐、煎黄金糕，等等~哩度上菜速度认真一般，我见到旁边几张台近乎都上晒餸嘞，我哋都未上，感觉上旁边几张台嘅都係本地人，或者我哋唔係，所以相对怠慢...等咗几个字之后终于上菜，好彩跟住哩都几快，唔会食完1个先上1个咁...印象最深刻嘅就係禾秆蒸猪肉嘞，开始我哋都有啲想象，但係一上菜嗰阵都仲係有啲惊奇，因为真係禾秆铺底蒸肥猪肉，认真新奇趣怪！我唔钟意食肥猪肉，但係哩个肥猪肉口感几好，唔似食紧肥猪肉嘅，有啲似面豉蒸肥猪肉嘅口感，味道都几好，就係淡啲；蒸猪肉丸几大盘，猪肉丸入面係有云耳喺度，口感爽口弾牙，味道唔错，稍嫌干咗啲；蒸黄骨鱼卖相就好一般，不过条鱼几鲜美，肉几滑，配埋蒸嘅豉汁几好食，个个都话唔错，嗰啲禾秆蒸嘅肥猪肉点埋哩碟味都啱晒，哈哈；黄金糕平时我少食，父母食得比较多，佢哋话煎得几好食，我觉得煎得比较干脆，口感几好，味道稍甜，不过仲係多啲油，食多啲会觉得漏~沙田生态休闲农庄生态环境一流，食材都几新鲜，味道几好，而且性价比高，我哋6个人食先270蚊，真係几抵，唔错~以前经常心水到就话去食鸡，依家多咗个新选择，就係心水到可能都会去沙田啦~

地方比较大.环境很好.空气很好.味道不错.比较有特色.价格不贵